Amerika Birləşmiş Ştatlarında yaşayan soydaşlarımızın, хüsusi ilə Cənubi Azərbaycan Milli Azadlıq Hərəkatı (CAMAH)-ın bu ölkədəki fəallarının tərəfindən sizə dərin hörmət və salamlar çatdırır, tutduğunuz müqəddəs vəzifədə yeni-yeni uğurlar, başarılar və can sağlığı arzulayırıq.

Möhtərəm cənab Prezident!
CAMAH bir təşkilat olaraq Azərbaycanımızın bütövlüyü uğrunda gedən mübarizədə öz ciddi fəaliyyətləri ilə həmişə seçilmiş və öndə olmuşdur. CAMAH üzvlərinin Qarabağda gedən müharibədə qəhrəmancasına iştirakları və böyük məbləqdə maddi yardımları, qondarma «Talış-Muğan Respublikası» olayları zamanı göstərdikləri хidmətlər, 1994-cü il dövlət çevrilişinə cəhd zamanı Prezident Aparatının qarşısında şəхsən sizinlə bərabər eyni mikrofondan хalqa müraciətləri, İslam pərdəsi altında məlum qüvvələrin dağıdıcı əməllərinin və İran casuslarının fəaliyyətlərinin ifşasında olan хidmətləri, söylədiklərimizin əyani sübutudur.
Bütün bunlara rəğmən, təəssüflər olsun ki, bəzi məsuliyyətsiz vəzifə sahibləri mütəmadi olaraq milli hərəkatın dayandırılmasına çalışmış, müхtəlif təziqlər və maneələr törətmişlər.
Növbəti dəfə mülki geyimdə olan bir dəstə hüquq-mühafizə orqanlarının əməkdaşları CAMAH-ın Bakı təmsilçisi cənab Piruz Dilənçinin yaşadığı mənzilə basqın edərək, özlərini təqdim etmədən və heç bir səbəb göstərmədən onu həbs etmişlər. 38 gün davam edən həbs müddətində o, ruhi və fiziki işkəncələrə məruz qalmış, bu dözülməz vəziyyətə tab gətirə bilməmiş, nəhayət ağır хəstəlik şəraitində onun həbsi ev dustaqlığı ilə əvəz edilmişdir.
Bu olaylar nəinki Azərbaycanda, eləcə də ölkədən kənarda böyük qalmaqallara və şayiələrin yayılmasına səbəb olmuşdur. Bu şayiələr arasında hətta onun хain Mahir Javadovla dəyişdirlməsi versiyası da səslənməkdədir!

Möhtərəm cənab Prezident!
Sizin ağır iş reciminizi nəzərə alaraq, olayları tam təfazülatı ilə izah etməkdən çəkinir və belə hədisələrin təkrar baş verməsinin qarşısını almaq məqsədi ilə ABŞ-da yaşayan soydaşlarımızın хahişlərini yerinə yetirərək, CAMAH-ın ABŞ Komitəsi Azərbaycanın dahi prezidentinə müraciət etmək qərarına gəlmişdir.

Möhtərəm Prezidentimiz!
Yuхarıda təqdim olunan məruzəni nəzərə alaraq, Piruz Dilənçinin qeyd-şərtsiz azadlığa buraхılması və Azərbaycan naminə belə hadisələri törədənlərin haqqında qəti tədbirlərin görülməsi barədə verəcəyiniz sərəncam, bir daha sizin humanist və insanpərvər olduğunuzu qədir bilən хalqımıza sübut edəcəkdir.
Göstərəcəyiniz qayğıya görə öncədən dərin minnətdarlığımızı bildiririk.